غصون الليالي .... للمبدع عماد الشريف

لو تثمر غصون الليالي بالأحلام
وآمالنا العذبات يدني جناها

ويصفي لنا قرطوع  من نبع الأيام
قرطوع يقطع للضوامي ضماها

ونبلّ به ريق المنى بعد ماصام
ونشرب من عدود الروى عذب ماها

ونقول للأفراح قدام قدام
قبل المنية تطحنّا رحاها

مادمت أنا حازم وجازم وعزام
ببلغ النفس الشقية مناها

وأنا أدري إن الحظ يخدم ليا قام
وإن وفق الله نفس حقق رجاها

والمجد محدٍ حازه إلا بالاقدام
واللي يبى الطالات يتعب وراها

والحر لو ما فالسما العالية حام
ما جاب لأصحابٍ تهده عشاها

والليا دخلت منافسة كون ضرغام
طول المسافة لا يهمك مداها

ولا تنخدع في لمعة أعلام الإعلام
فرق الرجال يبين في مستواها

ولا تغرك الكثرة وتحديد الأرقام
اتعب ورى العليا وتكسب صداها

ولا بد ما تلقى معك ناسٍ حشام
تدعيلك .. الله يستجيب لدعاها

ناس محبتهم على صدرك وسام
وأكبر رصيد إنك محقق رضاها

ومن يجتهد لا شك ماهو بمنلام
بعد اجتهاده كل نفس وجداها

وإن كانها راحت تخاريف وأوهام
ماهي  بجنة  عدن للي  بغاها