صوت وصدى ... المبدع غانم تركي الشمري المبدع زايد الحارثي

صوت وصدى ...غانم تركي الشمري
وشاعرنا المبدع زايد الحارثي

يا زايد البال شاغلته امور الحياه
والمشكله لا فضيت الثانيه تشغله

الثانيه حلم روحي غاب وابعد مداه
احل لي مشكله واطيح لي ّمشكله

غانم   مع زايد الحارثي

ما كل واحد بهالدنيــا محقـــق مناه
لا انفكّ من معضله يطب في معضله

لكـن عليــه الصبر ياخذ معه منتهـاه
ومن توكل على الرحمن ما يخـــذلـــه

زايد الحارثي

من جرب الحب مره ينطلق في سماه
يذوق حلوه ويتأقلم مع حنظله

والي مضيع طريق الحب ربي يقاه
ليته يتم يجهله ليته يتم يجهله

غانم

جيتــك بعمــق الزمـن حلوه يغالب رداه
طبع الزمـن سلسلــه يتبع لهـا سلسلــه

والحب ياصاحبي من هو سلم من عناه
من جربـــه يعرف احوالــه ولا يجــهـلــه

زايد

القلب غافل ونود الحب هبهب وجاه
وزاد هب الهوى يوم اكفخه واهبله

سحر العيون وجنونه يوم ذاق الشفاه
والشوق يوم" غدابه للخيال احمله

غانم

الحب في عالمي أشبه بفرض الصلاه
لا بـــدّ اعايش معاناتــه لحــد الولــــه

مهما تكون النتايج لازم اقنص مهــاه
وتعيـــش بين الحنايا بالغلا مــدللـــــه

زايد

محد" سأل عن خلوج النوق وشهو رغاه
وليلها اللي تحنه وشهو اللي اطوله

هاتف يصج المسامع صجها في نداه
والروح طارت وحطت ثم عاد جفله

غانم

يا حادي العيس خل النوق ترعى الفلاه
تعال شوف الضبا بين الجبــل وسهلــه

تشــدّ عيــن انتباهـك بالحــلا والحـــلاه
والصــيد ما أصعبه والشوف ما أسهله

زايد

ليت الضبا ما تفارق عين منهو بغاه
وليت لدّة عيونه لي تمت بصله

واسأل عيوني نظرها يمها وشبلاه
اثري النظر للولايف عشق يامجمله

غانم

درست في متحــف التاريخ عن ذا وذاه
وكــل واحد لــه اسلوبــه ولــه منهـــلــــه

من يركب الصعب مايحتاج درب الوطاه
ومن تعود على السهلات خــيّب هـــلــــه

زايد

الصعب ممشى ومدخل للعقول الدهاه
ما كل واحد تمشى واقترب يدهله

للصعب ناس" تروم لجانبه وتهواه
واللي بدا يكمله واللي بدا يكمله

غانم

العاشق ليا تجنـن لا تقــل وش بلاه
المخ عنده يصير اصغر من الخردله

وأظنني صرت ما بين النوى والنواه
سبة فتاةً بكـــل احــوالهــا مذهــلـه

زايد

تفتت القلب واصبح عرضة" للطغاه
وكل ظالم تجبر به بحكم اقتله

الموت واحد وشكل الموت في منتهاه
واحد بمضمونه ولكن ياكثر  علله

غانم